Nek manda eaŋ endɨ Papua Niuginilok provins no koi Morobe wolok kwet dɨp no wɨn Salowagat siŋgin wolok kapmainan kuaŋ wɨn Lae nanin 45 km wolok tuat, walɨ Boana gapman stesin wolok gwat kandaŋ. Nek manda eaŋ dɨwɨn no endɨ ŋaŋgɨlɨŋ Lae ba it kwet wopum dɨwɨn wolok gɨŋaŋ kuaŋ.
Nek manda wɨn Papuan manda no, tɨmet malap tɨpet, maim lambɨlak kandaŋ no tɨmbi maim pɨlak kandaŋ no. Walɨ Wain gɨnaŋ manda malap 4 woloŋ nanin no, endɨ Erap gɨnaŋ manda dɨwɨn no eaŋ wolok wekatsi dɨp, tɨmbi endɨ gɨtɨk Finisteri Huon gɨnaŋ manda pakaŋ endok patopsi. Wain gɨnaŋ manda wɨn Nuk walɨ Nektok main lambɨlambɨn kandaŋ, Nakama walɨ maim pɨpɨŋ kandaŋ tɨmbi Numaŋgaŋ walɨ siŋgi kandaŋ.
Bep-paŋdok kasat ŋɨndɨŋ eaŋ, Nek nasilɨ dama suo pat-kaŋgɨlɨŋ wɨn Lae it kwet wopum kandaŋ, kusei dɨwɨn nola tɨmbi wandɨ-pat wandɨ-pat tɨ-ta-ŋaŋgɨlɨŋ, walɨ gulat asup inda-sakta tɨ-ta-ŋakap man ŋɨndɨŋgɨt kuaŋnan tomgɨlɨŋ. Dama gula 40 ba nɨtek wolonda amatamdok kunakunatsi walɨ nɨm pakuk, gan 1978 wolonda kunakunalɨn walɨmet kunakunatsi 1257 wolok tuat.
Dama wandɨŋdok kasat yout kundit no nɨm tɨtɨn, Nek amatamdok kasat walɨ lakat sɨnɨk palɨŋɨlumbi gulat 1930 wolok gɨnaŋ Luterandok Gɨŋgɨt Manda eeŋ ama gɨt satnin misinari endɨ Nek kwet simba gɨnaŋ bɨ-suaŋgɨlɨŋ. Tɨmbi Nek amatamdɨ Kulum Yambattok gɨnaŋ slondok gɨŋgɨt eeŋ ama wɨn nandɨ-semum bɨŋgɨlɨŋda tɨmbi Nek kɨkesɨtmɨn indaŋguk. Tɨmbi Pisin gɨt Kote manda walɨ saktaŋgukta tɨmbi gulat asupgan kɨkesɨtmɨn gɨnaŋ gɨŋgɨt manda eeŋ wɨn manbda tɨpet wɨn eaŋgɨlɨŋ.
Morobe Provinslok flek patak wolok wakan Nek amatamdɨ kuaŋ.
